தஞ்சாவூர் ஓவியம்

தஞ்சாவூர் ஓவியங்கள், மரப்பலகையில் ஒட்டப்பட்ட துணியின் மீது சுண்ணமும் பசையும் கலந்த கலவை பூசி வரையப்படும் பக்தி ஓவியங்கள். உருவங்களைச் சுற்றிப் புடைப்பு வேலை செய்து, அதன் மேல் தங்கத் தகடு ஒட்டி, கண்ணாடிக் கற்கள் அல்லது விலையுயர்ந்த கற்கள் பதித்த பின், அடர் வண்ணங்களால் உருவங்கள் தீட்டப்படுகின்றன. 17 முதல் 19ஆம் நூற்றாண்டு வரை தஞ்சையை ஆண்ட நாயக்கர், மராட்டிய மன்னர்களின் காலத்தில் செழித்த இக்கலை, 2007இல் புவிசார் குறியீடாகப் பதிவு செய்யப்பட்டது.